Tori don carry am say police don arrest one man wey dem dey call Sikiru Odejide because he go sleep with hin 13-years old daughter and he kon talk say na devil make am do am.
Na the Police Public Relations officer wey dem dey call Abimbola Oyeyemi talk the claim wey the man make when he dey address the news people.
The talk-talk person of the command talk say them know about wetin the man dey do from the complain wey the mama of the small girl make to the police and that na wetin make them arrest the man and tori still carry am say the mama of the girl and the papa wey do this thing so don separate for some time now.
Oyeyemi still talk say the mama of the victim report the case for Sango Police Station say her daughter come her house of Ijesha-Tedo area for Lagos state to report to her say her papa don dey with her since December 2016.
The talk-talk person of the command kon talk say the mama of the girl talk say the daughter talk say the 41-years old papa threaten to kill the girl wey be hin own pikin if she tell anybody about am.
But the small according to Oyeyemi kon talk say she no fit bear the thing wey oyibo dey call sexual assault again na wetin make she go tell her mama wetin the papa don dey do her since.
The commissioner of police wey dem dey call Ahmed Iliyasu, don give the order say make dem transfer the girl papa to wetin dem dey call Anti-human trafficking and child labour unit of the State Criminal Investigation and Intelligence Department for further investigate.
The CP kon direct make them take the small girl to hospital make she fit collect better treatment.