Una remember the tori of the baby Dauda wey hin 17 years old step mama Bara’atu Rabiu cut hin private part for Niger state on June 18 2016? Tori carry am say the small boy wey don turn one year don die after one kind short sickness.
Tori follow talk say na malaria hold the small pikin and the doctors try everything wey dem fit do for their power to save the boy but e no work. Dem talk say no be because the boy step mother cut hin private part na hin make the sickness strong ,say the boy don dey do well after dem don carry am go obodo oyibo for surgery. Tori even talk say dem dey plan carry the boy go obodo oyibo go do wetin oyibo people dey call genital transplant (that one na to give the boy another private part) before the boy kon sick.
As we hear am say dem never sentence the woman go prison, say she just dey inside cell. The people wey dey support the small boy don talk say dem go make sure say the judgement happen fast fast, make she quick start her prison life.
The boy wey die make even the governor feel bad, as him and hin wife been dey plan to take care of the boy, if to say the boy no die and him go do that surgery come back.