Di Emmys Awards kom out last night tu troway salute give people wey dey provide correct entertainment for television for America.
Some of di people wey chop plenty awards for di event na Donald Glover wey collect award for best lead actor for comedy series and directing for comedy series for “Atlanta”. Also, “The Voice” carry award for reality competition program.
Dis year, dem put eye for inside di matter of domestic violence as one series, “Big Little Lies” collect five awards for di night.
Dis na as Nicole Kidman wey win Best Lead Actress for her role for di movie talk about di power of television wey dey allow people like am talk about di matter for ground.
See some of big things wey happen for di night:
No be small tin as dem sama President Donald Trump matter for ground dis year. From introduction talk-talk by di host Stephen Colbert tu even when winners dey collect their award, everybody just chook mouth put inside Trump matter.
Alec Baldwin, wey win award for best supporting actor for comedy, talk say, “I fit talk am say finally, oga president, na your Emmy be dis,”
Everybody shock when former talk-talk persin for inside White House, Sean Spicer show face for inside di event. Melissa McCarthy, wey bi comedian wey win award sake of say she dey act Spicer for ‘Saturday Night Live’, open mouth when she see am, as if na ghost she dey see.
Even though di night been dey about entertainment and tins wey dey television wey dey sweet many people for mind, actress Nicole Kidman use di time wey she get when she colllect award take talk about domestic abuse. She talk say, “we don torch light di matter of domestic abuse. Na serious disease wey we dey grow. Na the thing wey dey full ground pass as we dey allow ourselves to sabi.”
First Time For History:
Lena Waithe wey also bi Emmy Awards winner, She make history as di first African American woman to carry Emmy say she dey write comedy. She collect di award with person wey dey write with am Aziz Ansari and dem collect di award for di episode “Thanksgiving” wey dem write for di series “Master of None”.
See Some Foto from the event.